HINILING Ni Chief Public Attorney Persida V. Rueda-Acosta sa hukuman sa Infanta, Quezon na pagbalik-aralan ang desisyon nitong tumangging makapagpiyansa sa kasong murder si Maria Miradel Torres, isang kasapi ng Gabriela sa Quezon Province.
Ani Atty. Acosta, mayroong Enrile doctrine mula sa Korte Suprema na nagpahintulot kay Senador Juan Ponce Enrile na makapagpiyansa mula sa kasong plunder "on humanitarian grounds."
Ipinaliwanag ni Atty. Acosta na si Torres ay isang inang nagpapasuso ng kanyang sanggol at mahihirapang makalayo sa kanyang anak.
Mayroon na ring kaso na pinamagatang People of the Philippipnes vs Monda na nagpawalang-sala sa akusado dahilan sa 'di pagkakatugma ng mga pahayag ng mga saksi ng taga-usig. Isang saksi ang nagsabing narinig lamang niya ang mga pangalan ng 39 na tao sa sinasabing pananambang noong Marso 2012 sa Infanta, Quezon.
Nagparating ng motion for reconsideration ang mga abogado ni Torres noong ika-19 ng Abril matapos tanggihan ng hukuman ang bail petition noong ika-apat ng Abril dahil positibo umanong nakilala ni Private First Class Bamba si Torres na kasama sa mga nanambang.
Apat na buwang buntis si Torres ng madakip ng walang warrant of arrest ng pinagsanib na mga tauhan ng Philippine National Police at Armed Forces of the Philippines noong Hunyo ng 2014 sa Lucena City. Nahaharap si Torres sa kasong murder at frustrated murder sa Regional Trial Court Branch 65 sa Infanta, Quezon. May 38 iba pang mga aksuado ang nasa Taguig City Jail sa Camp Bagong Diwa. Nagsilang si Torres ng kanyang sanggol na lalaki noong Nobyembre 2014.
