Sa pagtataguyod ng Leiden University Grotius Centre for International Legal Studies ng Netherlands at Wuhan University China Institute of Boundary and Ocean Studies ng Tsina, idinaos kahapon, Linggo, ika-26 ng Hunyo 2016, sa Hague, Netherlands, ang pandaigdig na symposium hinggil sa South China Sea arbitration. Lumahok dito ang mahigit 30 eksperto mula sa mga bansa, na gaya ng Netherlands, Tsina, at iba pa.
Sa kanyang talumpati sa symposium, sinabi ni Liu Huawen, eksperto mula sa Institute of International Law ng Chinese Academy of Social Sciences, na limitado ang United Nations Convention on the Law of the Sea (UNCLOS), at hindi nakalakip dito ang lahat ng mga isyung pandagat. Kaya aniya, pinaninindigan ng Tsina, na gamitin ang mga pandaigdig na batas, na kinabibilangan ng UNCLOS, para lutasin ang mga hidwaan sa dagat. Binigyang-diin ni Liu, na ang hidwaan sa South China Sea ay may kinalaman sa karapatang pangkasaysayan o historical rights. Ang terminong ito aniya ay isang konseptong pambatas na lumitaw bago marating ang UNCLOS, at kakaunti ang nilalaman ng UNCLOS hinggil dito. Dahil dito, ipinalalagay ni Liu, na hindi sapat ang paggamit lamang ng UNCLOS, para lutasin ang isyu ng South China Sea.
Sinabi naman sa symposium ni Tom Zwart, propesor ng School of Law ng Utrecht University ng Netherlands, na mula sa kanyang anggulo, ang South China Sea arbitration ay isang paraang pulitikal ng Amerika para pigilin ang pag-unlad ng Tsina. Ipinalalagay niyang mapanganib ang ganitong aksyon ng paggamit ng pandaigdig na batas, para makaabot sa pulitikal na target. Ito aniya ay masama sa pandaigdig na batas at relasyon ng mga may kinalamang bansa. Dagdag pa ni Zwart, ang pinakamagandang solusyon sa isyu ng South China Sea ay pagbalik ng iba't ibang panig sa talastasan at pagsasanggunian.
Salin: Liu Kai