Ipinahayag kamakailan ni Oh Ei Sun, nakatataas na mananaliksik sa S. Rajaratnam School of International Studies ng Nanyang Technological University ng Singapore, na ang talastasan at pagsasanggunian ay nananatiling pinakamagandang paraan para lutasin ang isyu ng South China Sea. Aniya pa, malulugod ang mga bansang ASEAN, kung panunumbalikin ng Tsina at Pilipinas ang talastasan hinggil sa isyung ito.
Dagdag ni Oh Ein Sun, mahalaga ang pagpapanumbalik ng direktang talastasan ng Tsina at Pilipinas. Dahil ito aniya ay makakabuti sa pagpapahupa ng tensyon sa South China Sea, at mapapalakas din ang hangarin ng iba pang may kinalamang panig sa isyu ng South China Sea sa pakikipagtalastasan sa Tsina.
Ipinalalagay din ni Oh Ein Sun, na umiiral pa rin sa rehiyon ng South China Sea ang mga hamon sa di-tradisyonal na seguridad, na gaya ng pamimirata, terorismo, at iba pa. Bilang tugon sa mga ito, dapat aniyang isagawa ng iba't ibang panig ang kooperasyon sa mga aspekto ng magkakasanib na pagpapatrolya, pagbabahagi ng impormasyon, at iba pa, para matamo ang komong kapakinabangan.
Salin: Liu Kai