Binuksan ngayong araw, Linggo, ika-24 ng Hulyo 2016, sa Vientiane, Laos, ang Ika-49 na Pulong ng mga Ministrong Panlabas ng Association of Southeast Asian Nations (ASEAN).
Sa kanyang talumpati sa seremonya ng pagbubukas, ipinahayag ni Punong Ministro Thongloun Sisoulith ng Laos, kasalukuyang bansang tagapangulo ng ASEAN, na kinakaharap ngayon ng rehiyon at daigdig ang mga hamon mula sa tradisyonal at di-tradisyonal na seguridad. Dapat aniyang palakasin ang namumunong papel ng ASEAN sa rehiyon, para patingkarin nito ang mas mahalagang papel sa kooperasyong panrehiyon at pandaigdig.
Umaasa rin si Sisoulith, na isasagawa sa pulong na ito ang matapat at konstruktibong talakayan, para makapag-ambag sa kapayapaan, katatagan, at kasaganaan ng rehiyon at daigdig.
Tatagal ng isang araw ang kasalukuyang pulong ng mga ministrong panlabas ng ASEAN. Bukas at samakalawa, idaraos din ang mga pulong na gaya ng Pulong ng mga Ministrong Panlabas ng ASEAN at Tsina, Pulong ng mga Ministrong Panlabas ng ASEAN, Tsina, Hapon, at Timog Korea, at iba pa.
Salin: Liu Kai