NAGDESISYON na ang Korte Suprema at nagsabing walang nilalabag na probisyon sa Saligang Batas ang Enhanced Defense Cooperation Agreement na nilagdaan ng Pilipinas at Estados Unidos ilang taon na ang nakalilipas.
Tumanggi ang Korte Suprema sa botong 9-4 at tinanggihan ang motions for reconsideration na ipinarating nina dating Senador Rene Saguisag at Wigberto Tanada at ang militanteng grupong Bagong Alyansang Makabayan kasama na ang ilang party-list groups. Kasama sina Senador Saguisag at Tanada sa 12 mga senador na bumoto upang mapatalsik ang mga base militar ng America sa Pilipinas noong 1991.
Wala umanong bagong argumento ang mga nagpetisyon upang mabaliktad ang desisyon noong nakalipas na ika-12 ng Enero.
Ayon kay Information Chief Atty. Theodore Te na walang bagong argumento ang mga nagpetisyon upang panindigan ang pagkakamali sa panig ng Korte Suprema. Pawang inulit lamang ng mga nagpetisyon ang mga argumento.
Noong nakalipas na Enero, lumabas ang desisyon na 10-4-1 na nagsabing ang EDCA ay isang executive agreement na pinahihintulutan ng Saligang Batas ang pangulo na makipagkasundo. Maliwanag nito sa Article 18, Section 25 ng 1987 Constitution.
Sinabi ng BAYAN sa kanilang 82-pahinang motion for reconsideration na ang mga mamamayan sa pamamagitan ng Senado ay nararapat maging kinatawan ng mga mamamayan sa talakayan sa pagpasok ng banyagang mga kawal sa bansa.
Ayon sa dalawang senador, nahihirapan silang tanggapin ang naunang desisyon lalo pa't nakasalalay ang kinabukasan ng kanilang mga apo na hindi nararapat desisyunan ng pangulo at kalihim ng tanggulang pambansa lamang. Ang pamahalaan ay binubuo ng nakararami at hindi ng dalawa katao lamang.
