LIBU-LIBONG PAMILYA APEKTADO NG MGA SAGUPAAN SA BASILAN. Umabot na sa 17,000 katao ang lumikas mula sa tatlong bayan ng Basilan at lumipat sa kanilang mga kamag-anak sa mas ligtas na pook. Nangangamba silang mapagita sa mga sagupaan ng mga kawal ng pamahalaan at mga armadong pinaniniwalang kabilang sa Abu Sayyaf. Makikita sa larawan ang pagdadala ng tulong ng mga tauhan ng International Committee of the Red Cross at Philippine Red Cross sa Balisan. (ICRC Photos)
UMABOT na sa 3,400 pamilya ang lumikas mula ng sumiklab ang mga sagupaan sa pagitan ng mga kawal at mga armadong grupo noong unang linggo ng Hulyo sa Basilan.
Ayon sa International Committee of the Red Cross (ICRC), ang mga apektadong pamilya ay mula sa mga bayan ng Tipo-Tipo, Al-Barka at Ungkaya Pukan. Lumikas sila patungo sa kanilang mga kamag-anak matapos ang serya ng mga pambobomba at panganganyon sa nakalipas na tatlong linggo. Nabalita na rin ang pagkasawi at pagkakasugat ng mga mandirigma sa magkabilang panig samantalang ilang mga karaniwang tao ang nasugatan na rin sa mga sagupaan.
Ayon kay Yann Fridez, nakababahala ang seguridad sa Basilan sapagkat inaasahan nilang magpapatuloy ang mga sagupaan sa mga susunod na linggo. Si Fridez ang pinuno ng International Committee of the Red Cross sub-delegation sa Mindanao.
Nanawagan siya sa magkabilang-panig na kumilos at iwasan ang malubhang pinsala sa mga karaniwang tao. Nanawagan din siya sa mga magkakatunggaling puwersa na iwasa ang mga pagamutan, mga paaralan at mga tahanan at mga pasilidad na ginagamit ng mga mamamayan.
Namahagi na rin ang ICRC sa tulong ng Philippine Red Cross ng may mga hygiene kits, kumot, tuwalya, lata, mga mga kulambo at banig. Nakinabang ang may 17,000 mamamayan sa tatlong bayan. Kahapon nagtapos ang pamamahagi ng mga kagamitan sa kanilang tahanan.
