ISANG maluha-luhang nagdadalang-tao ang humarap sa pagdinig ng Senado at naglahad ng kanyang nakita kung paano pinahirapan ng pulis ang kanyang kinakasama at ang kanilang dalawang taong gulang na anak na babae sa isang buy-bust operation noong nakalipas na Hulyo.
Sa pagdinig na isinahimpapawid ng mga himpilan ng radyo't telebisyon, sinabi ni Harra Kazuo na noong gabi ng Miyerkoles, ika-anim ng Hulyo, tatlong pulis ang pumasok sa kanilang tahanan sa Pasay City at hinanap ang kanyang kinakasamang si JP Bertes.
PAGDINIG SA EXTRAJUDICIAL KILLINGS, SINIMULAN. Makikita si Senate Committee on Justice Chairman Leila de Lima (dulong kaliwa) na nakikinig sa mga saksi sa idinaos na pagsisiyasat ng kanyang komite sa sinasabing extrajudicial killings na nagsimula kamakailan. (SENATE PRIB Photo)
Nagtanong ang mga pulis kung saan naroon ang mga bawal na gamot. Inamin ni Kazuo na isang drug pusher ang kanyang kinakasama at nagsabing handa nang siyang isuko sa mga autoridad.
Sa tanong kung bakit isusuko si Bertes, sinabi ni Kazuo na natatakot siyang mamatay ang kanyang kinakasama. Hinalughog umano ng pulis ang kanilang tahanan hanggang sa alisin ng pulis ang saplot na suot ng kanyang dalawang taong gulang na anak na babae. Nasaksihan ng kanyang anak at ng kanyang biyenan ang naganap sa kanilang tahanan.
PNP CHIEF, DUMALO SA PAGDINIG. Makikita si Philippine National Police chief Director General Ronald dela Rosa na kinakausap si Senador Leila de Lima bago nagsimula ang pagdinig sa sinasabing extrajudicial killings na may kaugnayan sa anti-illegal drug campaign. (SENATE PRIB Photo)
Pinagbantaan pa umano ng pulis na papatayin si Bertes subalit nagmakaawa siyang huwag naman sa harap ng kanyang pamilya. Hindi nagtagal ay dumating ang kanyang biyenang lalaki, si Renato Bertes, samantalang naghahalughog ang mga pulis. Wala umanong natagpuang droga sa kanilang tahanan.
Dinala ang kanyang kinakasama at ang kanyang biyenang lalaki sa himpilan ng pulisya sa Station Against Illegal Drugs detention cell. Namatay ang mag-ama samantalang nagtatangkang mangagaw umano ng baril ng isa sa mga pulis.
Tumagal ang pagdinig ng higit sa tatlong oras. Itutuloy ang pagdinig ng Senate Committee on Justice bukas ng umaga.
