Sa okasyon ng ika-30 anibersaryo ng paglahok ng Tsina sa Asian Development Bank (ADB), ipinalabas kamakailan ni Takehiko Nakao, Gobernador ng bangkong ito, ang artikulong nagbibigay-diin sa pagpapalalim at pagpapalawak ng kooperasyon ng dalawang panig.
Binalik-tanaw ni Nakao ang kooperasyon ng ADB at Tsina. Aniya, sapul nang ilabas noong 1987 ng ADB ang unang pautang sa Tsina, hanggang noong katapusan ng nagdaang taon, umabot na sa 34 bilyong dolyares ang kabuuang halaga ng mga pautang ng ADB sa Tsina. Kabilang dito aniya, halos kalahati ng mga pautang ay pumunta sa sektor ng komunikasyon at transportasyon ng Tsina. Dagdag ni Nakao, nitong ilang taong nakalipas, inilabas, pangunahin na, ng ADB ang mga pautang sa Tsina, para tulungan ito sa pag-u-upgrade ng estrukturang pangkabuhayan, pagbabawas ng kahirapan, at paglaban sa pagbabago ng klima.
Sinabi rin ni Nakao, na ang "Partnership for the Better World" ay tema ng selebrasyon ng ika-30 anibersaryo ng paglahok ng Tsina sa ADB. Nakahanda aniya ang ADB, kasama ng Tsina, na pasulungin ang rehiyonal na kooperasyon sa mga aspekto ng pagpapalakas ng interkonektibidad sa komunikasyon, enerhiya, at telekomunikasyon, at pagtataguyod ng pasilitasyon ng kalakalan.
Salin: Liu Kai