Ipinahayag nitong Linggo, Disyembre 11, 2016, ni American President-elect Donald Trump ang kanyang ganap na pagkakaunawa sa "One China Policy," ngunit hindi umano niya maintindihan kung bakit ipagpapatuloy ang nasabing patakaran kung hindi magkakasundo ang Amerika at Tsina sa mga iba pang temang tulad ng kalakalan.
Kaugnay nito, ipinagdiinan Lunes, Disyembre 12, 2016, ni Tagapagsalita Geng Shuang ng Ministring Panlabas ng Tsina, na batid ng panig Tsino ang nasabing impormasyon, at lubos nitong ikinababahala ang tungkol dito. Aniya, ang isyu ng Taiwan ay may kaugnayan sa soberanya at kabuuan ng teritoryo ng Tsina, at ito ay nukleong kapakanan ng panig Tsino.
Hinihimok aniya ng panig Tsino ang bagong pamahalaan at lider ng Amerika na lubos na alamin ang mataas na sensitibidad ng isyu ng Taiwan. Dapat kalmado at maayos na hawakan ng Amerika ang isyung ito upang maiwasan ang pagkakapinsala ng pangkalahatang kalagayan ng relasyong Sino-Amerikano, dagdag pa niya.
Salin: Li Feng