Sinabi kahapon, Lunes, ika-26 ng Disyembre 2016, sa Beijing, ni Tagapagsalita Hua Chunying ng Ministring Panlabas ng Tsina, na ang estratehikong koordinasyon ng Tsina at Rusya ay mahalagang tagapagtaguyod ng kapayapaan at katatagan ng daigdig.
Winika ito ni Hua, kaugnay ng pahayag na ipinalabas kamakailan ni Pangulong Vladimir Putin ng Rusya hinggil sa relasyong Ruso-Sino. Sinabi ni Putin, na ang relasyon ng Rusya at Tsina ay lumampas na sa karaniwang estratehikong partnership. Aniya pa, marami ang komong palagay ng Rusya at Tsina sa mga isyung pandaigdig, at ito ay naging mahalagang elemento ng katatagan sa mga suliraning pandaigdig.
Bilang tugon, sinabi ni Hua, na positibo ang panig Tsino sa naturang pahayag ng panig Ruso. Aniya, ang komprehensibong kooperasyon ng Tsina at Rusya sa iba't ibang aspekto, ay hindi lamang nagdudulot ng benepisyo sa mga mamamayan ng dalawang bansa, kundi nagbibigay rin ng positibong elemento sa kasaganaan ng rehiyon at daigdig.
Dagdag pa niya, sa susunod na taon, nakahanda ang Tsina, kasama ng Rusya, na patuloy na patatagin at paunlarin ang estratehikong partnership ng dalawang bansa, at pangalagaan ang kapayapaan, katiwasayan, at katatagan ng rehiyon at daigdig.
Salin: Liu Kai