Idinaos kahapon, Biyernes, ika-20 ng Enero 2017, sa Moscow, Rusya, ang pagsasanggunian ng mga pangalawang ministrong panlabas ng Shanghai Cooperation Organization (SCO). Kalahok dito ang mga opisyal ng iba't ibang kasaping bansa ng SCO, pangkalahatang kalihim ng organisasyong ito, direktor ng Executive Committee ng SCO Regional Anti-Terrorist Structure, at iba pa.
Nagpalitan ng palagay ang mga kalahok hinggil sa pag-unlad ng SCO sa ilalim ng bagong kalagayan. Ipinalalagay nilang dapat ibayo pang palakasin ang koordinasyon ng mga kasaping bansa ng SCO, magkakasamang pangalagaan ang katiwasayan at katatagan sa rehiyong ito, at palalimin ang pragmatikong kooperasyon ng mga kasaping bansa sa iba't ibang aspekto.
Salin: Liu Kai