Nagpadala ng mensahe, ngayong araw, Miyerkules, ika-10 ng Mayo 2017, si Pangulong Xi Jinping ng Tsina, kay Moon Jae-in, bilang pagbati sa kanyang pagkakahalal bilang bagong pangulo ng Timog Korea.
Tinukoy ni Xi, na nitong 25 taong nakalipas sapul nang itatag ang relasyong diplomatiko ng Tsina at T.Korea, komprehensibo at malalimang umuunlad ang relasyon ng dalawang bansa, at mabunga ang kanilang pagpapalitan at pagtutulungan sa iba't ibang aspekto. Ito aniya ay nagdulot ng mga aktuwal na kapakinabangan sa mga mamamayan ng dalawang bansa, at nagbigay din ng positibong ambag sa kapayapaan at kaunlaran ng rehiyong ito.
Binigyang-diin ni Xi, na lubos na pinahahalagahan ng Tsina ang relasyon sa T.Korea. Sa pamamagitan ng pag-unawa at paggalang sa isa't isa, nakahanda aniya ang Tsina, kasama ng T.Korea, na patatagin ang pagtitiwalaan, maayos na hawakan ang mga pagkakaiba, palakasin ang pagkokoordinahan at pagtutulungan, at pasulungin ang malusog at matatag na pag-unlad ng relasyon ng dalawang bansa.
Salin: Liu Kai