NAGPASALAMAT ang Commission on Human Rights sa ulat matapos ang Universal Periodic Review Working Group hinggil sa kalagayan ng karapatang pangtao sa Pilipinas at nagsabing marapat na tanggapin ni Pangulong Duterte ang mga rekomendasyon.
Ayon kay Chairman Chito Gascon, nagpapasalamat sila sa ulat ng United Nations at nanawagang tanggapin ng pamahalaan, partikular ng ehekutibo ang mga mungkahi ng iba't ibang bansang lumahok sa pagbabalik-aral.
Idinagdag pa ni G. Gascon na kailangang mapanagot ang lahat ng may kagagawan ng paglabag sa Karapatang Pangtao. Ito rin ang sinabi ng tagapagsalita ng Commission on Human Rights, si Atty. Jacqueline de Guia. Halos magkahalintulad ang mga mungkahi ng CHR at ng United Nations. Kasama sa mungkahi ang panawagan na payagan ang UN Special Rapporteur na magsagawa ng pagsusuri ng walang anumang kondisyon. Mas makabubuting anyayahan si Dr. Agnes Callamard na bumalik sa Pilipinas para sa isang official visit ayon sa Terms of Referrence ng United Nations.
Ang Francia, Alemania, Ghana, Hungary at Latvia ay kabilang sa mga bansang nanawagan sa pamahalaang payagan si Dr. Callamard na magsagawa ng pagsisiyasat ng walang anumang kondisyon.
Aabot sa 45 bansa ang nagpaabot ng kanilang pagkabahala sa sinasabing extra-judicial killings sa bansa. Kasabay nito ang panawagang huwag nang ibalik pa ang parusang kamatayan.
