|
||||||||
|
||
LUMAGO ng may 11.8% ang personal remittances na ipinadala ng mga Filipino sa ibang bansa sa unang tatlong buwan ng 2017 kung ihahambing sa nakamtang halaga noong nakalipas na taon. Umabot sa US$ 2.9 bilyon ang dumating na salapi sa bansa noong nakalipas na Marso.
Ayon kay Bangko Sentral ng Pilipinas Governor Amando Tetangco, nakamit ang halagang US$ 7.7 bilyon at mas mataas ito sa pumasok na salapi noong 2016. Ipinaliwanag ni Gobernador Tetangco na tumaas ang personal remittances dahilan sa 10.5% na inilago ng salaping padala ng mga manggagawa sa iba't ibang bansa na may mga kontratang higit sa isang taon at naging pambawi sa ibinabang 2.0% na salaping mula sa mga magdaragat at mga manggagawang may kontrata na mas maiksi sa isang taon.
Lumago rin ang salaping idinaan sa mga bangko sa pagkakaroon ng 10.7% na dagdag sa halagang US$ 2.6 bilyon.
Tumaas ang padalang salapi mula sa land-based workers sa halagang US$ 2.1 bilyon at 12.8% at mula sa mga magdaragat na nagpadala ng higit sa limang daang milyong dolyar na lumago ng 3.4%.
Nagmula ang karamihan ng salapi sa Estados Unidos na 3.9%, Canada at United Arab Emirates na nakapag-ambag ng 2.1% points, Japan na magkaroon ng 1.0% at Hong Kong na nagbigay ng 0.8% point.
Ang cash remittances na nakarating sa Pilipinas sa unang tatlong buwan ng taong 2017 ay umabot sa halagang US$ 7.0 bilyon na kinakitaan ng dagdag na 7.7% sa nakalipas na taon. Ang cash remittances mula sa land-based workers ay lumago ng 10.4% sa halagang US$ 5.6 bilyon na nakatakip sa 2.0% na kabawasan mula sa sea-based workers na umabot sa US$ 1.4 bilyon.
Halos 80% ng cash remittances ay mula sa Estados Unidos, Saudi Arabia, UAE, Singapore, Japan, United Kingdom, Qatar, Kuwait, Hong Kong at Canada.
© China Radio International.CRI. All Rights Reserved. 16A Shijingshan Road, Beijing, China. 100040 |