Mula noong ika-3 hanggang ika-8 ng Hulyo, 2017, dumalaw si Pangulong Xi Jinping ng Tsina sa Rusya at Alemanya, at dumalo rin siya sa G20 Summit sa Hamburg, Alemanya.
Kaugnay nito, inilahad ni Ministrong Panlabas Wang Yi ng Tsina ang mga katugong kalagayan.
Sinabi ni Wang na tagumpay ang biyaheng ito sa ibayong pagpapalakas ng estratehikong koordinasyon at pragmatikong pagtutulungan ng Tsina at Rusya sa mas mataas na antas. Aniya pa, ibayo pa nitong pasusulungin ang relasyong Sino-Aleman, pagtutulungan sa pagitan ng Tsina at Europa, pagpapasulong ng pagtutulungan ng G20, at pagbibigay ng bagong sigla sa pangangasiwang pangkabuhayan ng mundo.
Ani Wang, sa pananatili ng G20 Hamburg Summit, dumalo si Pangulong Xi sa mga talakayan hinggil sa kalagayang pangkabuhayan ng daigdig, kalakalan, pinansya, enerhiya, pagbabago ng klima, isyu ng Aprika, kalusugan, paglaban sa terorismo at iba pa. Inilahad ni Xi ang ideya at paninindigan ng Tsina sa mga may-kinalamang isyu, at pinaninindigan niya sa buong lakas na pagpapasulong ng kooperasyong pandaigdig, dagdag pa ni Wang. Sinabi pa niyang binigyang-diin din ng Pangulong Tsino na nagkakaisa at nagkokomplemento ang ideya ng pagbubukas, pagtutulungan at win-win situation na itinataguyod ng Belt and Road Initiative, at diwa ng partnership at pagtatatag ng bukas na kabuhayang pandaigdig na itinataguyod naman ng G20. Ito aniya'y para sa magkasamang pagpapasulong ng kabuhayang pandaigdig.
Ani Wang, nakapaloob sa kumunike na inilabas ng Hamburg Summit ang mga mungkahi at ideya na iniharap ni Pangulong Xi. Aniya, patuloy nitong ipinapatupad ang komong palagay na narating sa Hangzhou Summit ng G20.
Sinabi rin ni Wang, na mula noong ika-3 hanggang ika-8 ng Hulyo, dumalo si Pangulong Xi sa 40 bilateral at multilateral na aktibidad at nakipag-usap siya sa mga lider ng ibat-ibang bansa't organisasyong pandaigdig, na kinabibilangan ng Pangulo ng Amerika, Timog Korea, Pransya, Punong Minsitro ng Britanya at Singapore, at iba pa. Narating aniya ng mga lider ang mga bagong pagkakasundo sa pagpapatibay ng pagtitiwalaang pampulitika, at pagpapalalim ng bilateral at multilateral na kooperasyon.
Ipinahayag ni Wang na bilang bagong pahina sa kasaysayang pandiplomasiya ng Tsina na may katangiang Tsino, ang biyaheng ito ni Pangulong Xi ay nagpapalalim ng komprehensibong patakarang panlabas ng Tsina at nagpapataas ng aktibo at konstruktibong imahe ng bansa sa daigdig.
