Sa lalawigang Shanxi sa kanlurang Tsina, isang kastilyong may halos 400 taong kasaysayan ang naging bagong lugar na panturista, pagkaraan ng renobasyon.
Ang naturang kastilyo ay tinatawag na Xiangyu Castle. Matatagpuan ito sa Qinshui County sa timog silangang bahagi ng lalawigang Shanxi. Sinimulan ang konstruksyon ng kastilyong ito noong 1623 at natapos noong 1634, sa panahon ng Ming Dynasty ng Tsina. Pinatayo ito ng lokal na pamilyang may apelyidong Sun, para sa kanilang mga kamag-anakan at kababayan. Kilalang kilala ang pamilyang Sun sa lokalidad, dahil sa apat na kapatid ng pamilya, tatlo ang naging mataas na opisyal sa sentral na pamahalaan ng Ming Dynasty.
Halos 32.5 libong metro kuwadrado ang kabuuang saklaw ng kastilyong ito, na yari sa laryo, bato, lupa, at kahoy. Itinayo ito sa paanan ng burol, at nakaharap sa ilog. Ang mga arkitektura sa loob ng kastilyo ay kinabibilangan ng mga mansyon, karaniwang tahanan, templo, ancestral hall, paaralan, at iba pa.
Simula noong 2014, batay sa mga nananatiling lumang arkitektura at kalyeng nilatagan ng bato, isinagawa ang malaking renobasyon sa kastilyo. Sa kasalukuyan, halos tapos na ito, at bubuksan bilang isang lugar na panturista.
