FR. ARCHIE INTENGAN, SJ MD PUMANAW NA. Namayapa na si Fr. Archie Intengan, dating propesor ng surgery sa Philippine General Hospital bago pumasok sa Society of Jesus. Isa sa kinikilalang matatalino sa mga Jesuita si Fr. Archie na naglingkod bilang Provincial ng kanilang kongregasyon mula 1998 hanging 2004. Huli siyang lumahok sa Wednesday Roundtable @ Lido noong nakalipas na iba-20 ng Setyembre sa paksang "Federalism." (Melo M. Acuna)
PUMANAW na si Fr. Romeo "Archie" J. Intengan kaninang umaga matapos atakehin sa puso sa edad na 75.
Si Fr. Archie ay isa sa mga propesor ng surgery sa University of the Philippines – Philippine General Hospital bago siya pumasok sa Society of Jesus noong ika-25 ng Hulyo, 1970. Naordenan sa pagkapari noong ika-27 ng Marso 1977 at nahalal na provincial o pinuno ng kanilang kongregasyon sa buong bansa mula 1998 hanggang 2004.
Nakilala siya sa kanyang paninindigan laban sa Batas Militar ni Ferdinand Marcos. Bumalik siya sa bansa matapos mawala sa poder si G. Marcos. Pansamantala siyang nanirahan sa Malaysia.
Pumanaw siya samantalang dinadala sa pagamutan kaninang umaga.
Ngayong gabi magsisimula ang paglalamay sa Oratory of St. Ignatius sa Loyola House of Studies at magkakaroon ng Misa sa bawat ika-walo ng gabi. Nakatakdang idaos ang funeral mass sa Sabado, ika-walo ng umaga sa Oratory of St. Ignatius sa loob ng Ateneo de Manila University campus.
Ihahatid sa huling hantungan ang kanyang labi sa Sacred Heart Novitiate sa Novaliches, Quezon City pagkatapos ng Misa. Naulila niya ang kanyang mga kapatid na sina Glicerio at Alexa Intengan.
