Si dating Finance Secretary Roberto de Ocampo ng Pilipinas
NANINIWALA si dating Finance Secretary Roberto de Ocampo na maganda ang kinabukasan ng relasyong namamagitan sa Pilipinas at Tsina matapos ang ika-19 na National Communist Party Congress noong Martes, ika-24 ng Oktubre.
Sa isang panayam, sinabi ni G. De Ocampo na naging pangulo rin ng Asian Institute of Management, na lagi siyang namamangha sa pagpapatuloy ng mga palatuntunan ng pamahalaan sinuman ang maluklok sa poder.
Nakatitiyak umano siyang magpapatuloy ang mga programa sa larangan ng ekonomiya. Kabilang sa mga programa ng pamahalaang Tsino ang pagtulong sa pagpapalakas ng mga ekonomiya ng mga bansang daraanan ng "One Belt, One Road" tulad umano ng Pilipinas na nangangailangan ng pagawaing-bayan. Sa programang ito, ayon kay Secretary de Ocampo, higit nauunlad ang mga bansa sa rehiyon.
Hinggil sa pagtutunggali ng Estados Unidos at Tsina sa South China Sea, sinabi ni G. De Ocampo na magandang pagkakataon ito upang makapag-usap at magamit ang diplomasya sapagkat magkahalintulad ang interes ng America at Tsina kaya't nararapat na walang maganap na anumang 'di pagkakaunawaan o digmaan.
Ani G. De Ocampo kung noo'y nasanay ang Estados Unidos na sila lamang ang naglalayag sa South China Sea, nararapat nang tanggaping makakasabay na nila sa karagatan ang umuunlad ng bansang Tsina.
Maganda rin ang dalang pagkakataon ng "One Belt, One Road" ng Tsina. Malawak umano ang potensyal nito sa Southeast Asian countries na dadaanan ng makabagong programa ng Tsina.
Kagagaling pa lamang niya sa Washington at nakausap niya ang ilang mga dating pinuno ng iba't ibang bansa sa Cental Asia na pawang nagmamasid sa mga programa sa ilalim ng "One Belt, One Road."
Sa oras na madama ang kaunlaran sa mga bansang matutulungan ng OBOR, tiyak na uunlad ang Asia at mangunguna na sa larangan ng kaunlaran sa daigdig.
Sa tanong kung ano ang kalakaran ng Pilipinas sa larangan ng ugnayang panglabas (foreign affairs), higit umanong maganda na magpatuloy ang "independent foreign policy" ng Pamahalaang Duterte sapagkat makikinabang ang bansa sa pakikipag-kaibigan sa iba't ibang mauunlad na lipunan tulad ng Tsina, America at maging ng Russia.
