Beijing-Idinaos Disyembre 4, 2017 ang Ika-2 Prime Ministers' Regular Annual Dialogue ng Tsina at Kanada. Magkasamang pinanguluhan ang pagtitipon nina Premyer Li Keqiang ng Tsina at Punong Ministro Justin Trudeau ng Kanada.
Ipinahayag ng dalawang PM ang pagpapahalaga sa konstruktibong papel ng mga mekanismong pandiyalogo ng Tsina at Kanada, na gaya ng Taunang Diyalogo ng mga Prime Minister, mga Ministrong Panlabas, Diyalogo ng Estratehiyang Pangkabuhayan at Pinansyal, at Diyalogo ng Pambansang Seguridad at Administrasyong Pambatas. Sinang-ayunan ng dalawang panig ang pagpalabas ng "Magkasanib na Pahayag hinggil sa Pagbabago ng Klima at Malinis na Pag-unlad ng Tsina at Kanada," at pagtatatag ng dalawang mekanismong pandiyalogo hinggil sa kapaligiran at malinis na enerhiya sa antas ng ministro. Ipinahayag din ng dalawang panig na ibayo pang pasusulungin ang estratehikong partnership ng Tsina at Kanada, pahihigpitin ang pagtutulungang pangkabuhayan at pangkalakalan, at palalawakin ang pagpapalitang di-pampamahalaan. Dagdag pa nila, magkasamang magpapasulong sa globalisasyon at malayang kalakalan ng daigdig.
Nang araw ring iyon, dinaluhan ng dalawang lider ang isang magkasanib na preskon at seremonya ng paglalagda sa mga dokumentong pangkooperasyon sa edukasyon, seguridad ng pagkain, enerhiya at iba pa.
