Sa bukas na pulong na idinaos nitong Martes, ika-13 ng Pebrero 2018, ng United Nations Security Council, hinggil sa isyu ng Myanmar, nanawagan sa komunidad ng daigdig si Ma Zhaoxu, Pirmihang Kinatawan ng Tsina sa UN, na manatiling matiyaga sa isyu ng Rakhine State.
Sinabi ni Ma, na masalimuot ang isyu ng Rakhine State, dahil sa mga elemento ng kasaysayan, etniko, at relihiyon, at hindi ito malulutas sa maikling panahon. Pinaninindigan aniya ng panig Tsino, na dapat maayos na hawakan ng Myanmar at Bangladesh ang isyung ito, sa pamamagitan ng bilateral na tsanel, para marating ang kasunduang katanggap-tanggap ng kapwa bansa.
Kaugnay ng pagkaabala sa pagbabalik ng mga mamamayang taga-Rakhine sa Myanmar mula sa Bangladesh, umaasa aniya si Ma, na mauunawaan ng komunidad ng daigdig ang mga kahirapan at hamong kinakaharap ng mga pamahalaan ng Myanmar at Bangladesh, at patuloy na kakatigan at tutulungan ang dalawang bansa para sa pagpapasulong sa gawaing ito.
Dagdag pa ni Ma, lubos na sinusubaybayan ng Tsina ang kalagayan sa Rakhine State. Iniharap aniya ng panig Tsino sa Myanmar at Bangladesh ang mga mungkahi hinggil sa paglutas sa isyung ito, at ang mga ito ay tinatanggap ng kapwa bansa.
Salin: Liu Kai
