|
||||||||
|
||
Davao City--Mahigit 3000 pamiliya sa Barangay Callaw, Davao City ang makaka-inom ng ligtas na tubig dahil sa proyekto ng water pump na ipinagkaloob ng Embahadang Tsino sa Pilipinas.
Ayon kay Zaldy M. Lingas, Engineering Assistant ng City Engineer's Office ng Davao City, matatapos ang konstruksyon ng water pump at mga may kinalamang pasilidad sa loob ng darating na 120 working day. Magkakaloob ang proyektong ito ng sapat at malinis na tubig-inumin para sa mga residente ng barangay, aniya pa.
Sa seremonya ng ground breaking, ipinahayag ni Zhao Jianhua, Embahador ng Tsina sa Pilipinas, na ang Tsina ay matalik na kapitbansa ng Pilipinas at nakahanda ang kanyang bansa na ipagkaloob hangga't makakaya, ang mga kinakailangang tulong sa Pilipinas para mapabuti ang pamumuhay ng mga Pilipino.
Naniniwala aniya siyang sa pamamagitan ng magkasamang pagsisikap ng dalawang bansa, siguradong makakalikha ng mas magandang kinabukasan ang mga Pilipino.
Pinasalamatan naman ni Mayor Sara Duterte ng Davao ang pagtulong ng Embahadang Tsino. Sinabi niyang ito ay isa pang palatandaan na ang pagkakaibigan at aktuwal na kooperasyon ng dalawang bansa ay angkop sa pundamental na kapakanan ng dalawang panig at kanilang mga mamamayan.
Bukod dito, sinabi niyang bukod sa nasabing proyekto, ipinagkaloob ng Tsina sa Pilipinas ang maraming tulong sa mga larangang gaya ng edukasyon, imprastruktura, at pangangalaga sa kapaligiran. Ito aniya ay makakabuti sa pag-unlad ng lipunan at pagbuti ng pamumuhay ng mga mamamayan.
Ang nasabing proyekto ng water pump ay nagkakahalaga ng 6 na milyong piso. Ang lahat ng mga kinakailangang pondo ay ibinigay ng Chinese Embassy, pero ang buong proseso ng konstruksyon at paggamit ng pondo ay inilagay sa ilalim ng superbisyon ng isang non-government organization sa Davao City.
Ulat: Ernest
Larawan: Sissi
Pulido: Rhio
Web editor: Liu Kai
| ||||
© China Radio International.CRI. All Rights Reserved. 16A Shijingshan Road, Beijing, China. 100040 |