Tokyo, Hapon—Ginunita Huwebes, Mayo 10, 2018 ng Tsina't Hapon ang ika-40 anibersaryo ng paglagda ng Tratado ng Kapayapaan at Pagkakaibigan. Lumahok dito sina dumadalaw na Premyer Li Keqiang ng Tsina at Punong Ministro Shinzo Abe ng Hapon, kasama ng halos 2000 kinatawan mula sa iba't ibang sektor ng dalawang bansa.
Pinagtibay, sa pormang legal, ng nasabing tratado ang mga prinsipyo ng Magkasanib na Pahayag ng dalawang bansa na inilabas noong 1972. Kabilang dito ay pagsisisi ng Hapon sa pananagutang pandigmaan, pananangan sa prisipyong Isang Tsina, at di-magmamaliw na pagkakaibigang Sino-Hapones sa hene-henerasyon.
Sa kanyang talumpati, sinabi ni Premyer Li na narating nila ng mga lider na Hapones ang serye ng pagkakasundo para bumalik sa normal ang relasyong Sino-Hapones, at isakatuparan ang pangmatagalan, malusog at matatag na pag-unlad.
Sa kanya namang talumpati, sinabi ni Abe na simula ngayon, ang bilateral na relasyong Sino-Hapones ay pumapasok na sa panahon ng koordinasyon, sa halip ng kompetisyon. Kung magkakabisig aniya ang Tsina't Hapon, maiigpawan nila ang anumang kahirapan.
Nauna rito, nakipagtagpo si Premyer Li sa mga kinatawang Hapones na nakilahok sa pagbalangkas at paglagda sa nasabing tratadong pangkaibigan ng Tsina't Hapon, na kinabibilangan nina Yasuo Fukuda, dating Punong Ministro, at Yohei Kono, dating Ispiker ng Mababang Kapulungan ng Hapon.
Salin: Jade
Pulido: Mac
