Ipinalabas Lunes, Setyembre 24, 2018, ng Tanggapan ng Impormasyon ng Konseho ng Estado ng Tsina ang white paper ng "Katotohanan at Posisyon ng Panig Tsino Tungkol sa Alitang Pangkabuhayan at Pangkalakalan ng Tsina at Amerika." Layon nitong ipaliwanag ang katotohanan ng relasyong pangkabuhayan at pangkalakalan ng Tsina at Amerika, ilahad ang patakaran at posisyon ng Tsina sa alitang pangkabuhayan at pangkalakalan ng dalawang bansa, at pasulungin ang makatuwirang paglutas sa isyung ito.
Anang white paper, ang Tsina ang pinakamalaking umuunlad na bansa sa daigdig, at ang Amerika naman ang pinakamalaking maunlad na bansa sa daigdig. Ang relasyong pangkabuhayan at pangkalakalan ng Tsina at Amerika ay may napakalaking katuturan hindi lamang sa dalawang bansa, kundi maging sa katatagan at kaunlaran ng kabuhayang pandaigdig.
Tinukoy nito na dahil sa pagkakaiba ng yugto ng pag-unlad ng kabuhayan at sistemang pangkabuhayan ng Tsina at Amerika, nagiging normal ang pag-iral ng alitang pangkabuhayan at pangkalakalan. Ang susi ay kung paano mapapalalim ang pagtitiwalaan, mapapasulong ang kooperasyon, at kokontrolin ang alitan, anito pa.
Ngunit, sapul nang maupo sa puwesto ang bagong pamahalaang Amerikano noong 2017, sa ilalim ng islogang "Ipauna ang Amerika," itinakwil nito ang mga pundamental na prinsipyong pandaigdig na gaya ng paggagalangan sa isa't-isa, at pantay na pagsasanggunian, at isinasagawa ang unilateralismo, proteksyonismo, at economic hegemonism.
Dagdag ng dokumento, sa harap ng kalagayang ito, iginigiit ng Tsina ang pundamental na prinsipyo ng paglutas sa alitan sa pamamagitan ng diyalogo at pagsasanggunian para mapangalagaan ang komong kapakanan ng dalawang bansa at pandaigdigang kaayusang pangkalakalan. Ngunit, walang humpay na pinaiigting ng panig Amerikano ang alitang pangkabuhayan at pangkalakalan sa Tsina, bagay na grabeng nakakapinsala sa relasyong pangkabuhayan at pangkalakalan ng dalawang panig. Upang mapasulong ang makatuwirang paglutas sa isyung ito, inilabas ng pamahalaang Tsino ang nasabing white paper.
Para sa Tsina at Amerika, ang kooperasyon ay siyang tanging tumpak na pagpili, dagdag pa ng white paper.
Salin: Li Feng
