Punong himpilan ng United Nations (UN), New York—Dumalo Miyerkules, Setyembre 26, local time, si Wang Yi, Kasangguni ng Estado at Ministrong Panlabas ng Tsina, sa pulong ng UN Security Council (UNSC) hinggil sa pangangalaga sa pandaigdigang kapayapaan at katiwasayan.
Ipinahayag ni Wang na ang pangangalaga sa pandaigdigang kapayapaan at katiwasayan ay pangunahing tungkulin ng UNSC at komong responsibilidad ng lahat ng mga miyembro nito.
Aniya, ang paninindigan ng Tsina sa isyu ng non-proliferation ay: una, dapat patibayin at kompletuhin ang international non-proliferation system; ika-2, dapat balanseng pasulungin ang pagpapatupad ng mga non-proliferation treaty; at ika-3, dapat pasulungin ang kooperasyong pandaigdig, at pataasin ang kakayahan ng iba't ibang bansa sa non-proliferation, para maisakatuparan ang unibersal na seguridad.
Dagdag ni Wang, ang Joint Comprehensive Plan of Action (JCPOA) ay bunga ng multilateralismo, at buong pagkakaisa itong inaprobahan ng UNSC. Hinimok ng panig Tsino ang Iran na patuloy na ipatupad ang iba't ibang pangako. Samantala, dapat igalang ang lehitimong karapatan at kapakanan ng iba't ibang panig sa pagsasagawa ng normal na kooperasyong pangkabuhaya't pangkalakalan sa Iran, aniya pa.
Kaugnay naman ng kalagayan ng Korean Peninsula, sinabi ni Wang na may malinaw na tunguhin ng paghupa ng situwasyon, at walang tigil na nagsisikap ang panig Tsino para rito. Dapat aniyang pahalagahan at samantalahin ang kasalukuyang pagkakataon, at idaan ang pangakong pulitikal ng iba't ibang bansa sa aktuwal na aksyon, para maisakatuparan ang pangmatagalang kapayapaan ng peninsula sa lalong madaling panahon.
Binigyang-diin ni Wang na buong tatag na sinusunod ng Tsina ang solemnang pangako sa simulain at prinsipyo ng UN Charter, pinangangalagaan ang modernong sistemang pandaigdig, kung saan, ang nukleo ay UN, at mataimtim na isinasabalikat ang sariling responsibilidad at obligasyong pandaigdig.
Ipinag-diinan din niyang sa nakaraan man o sa hinaharap, hinding-hindi nakikialam ang Tsina sa mga suliraning panloob ng alinmang bansa, at hinding-hindi rin nito tatanggapin ang anumang walang batayang pagbatikos hinggil dito. Nanawagan siya sa ibang bansa na sundin ang simulain ng UN Charter, at huwag makialam sa mga suliraning panloob ng ibang bansa.
Salin: Vera
