|
PengLiyuantalumpatibalita
|
New York, Amerika--Idinaos Miyerkules, Setyembre 26, 2018 ang mataas na pulong ng Ika-73 United Nations General Assembly (UNGA) hinggil sa paglaban sa tuberculosis (TB). Sa kanyang video speech sa pulong, nanawagan si Professor Peng Liyuan, First Lady ng Tsina at Goodwill Ambassador ng WHO para sa TB at HIV/AIDS, sa iba't ibang bansa ng daigdig, na magtulungan sa ilalim ng End TB Strategy ng World Health Organization (WHO), para sa pagbibigay-wakas sa pagkalat ng TB.
Isinalaysay din ni Peng ang kalagayan ng paglaban sa TB sa Tsina. Aniya, dahil sa pagpapahalaga ng pamahalaan at iba't ibang sektor ng lipunan ng bansa, at paglahok ng mahigit 700 libong boluntaryo, mabilis na sumusulong ang mga gawain ng Tsina laban sa TB. Sinabi niyang, tumataas sa Tsina ang case detection rate at cure rate ng mga may-sakit ng TB, at bumababa ang incidence rate at fatality rate ng sakit na ito.
Nangulo sa pulong si Maria Fernanda Espinosa Garces, Presidente ng UNGA. Pinagtibay sa pulong ang deklarasyong pulitikal tungkol sa Paglaban sa TB.
Ipinahayag ni Tereza Kasaeva, Direktor ng WHO Global TB Program, na bilang Goodwill Ambassador ng WHO para sa TB at HIV/AIDS at First Lady ng Tsina, ang ginawang pagsisikap ni Professor Peng ay nakapagpalakas ng kamalayan ng mga tao sa pagpigil at paggamot ng sakit.
Sinabi naman ni Dr. Lucica Ditiu, Executive Director ng Stop TB Partnership, na nalaman niya ang ginawang pagsisikap ng Tsina sa pagpigil sa TB. Pinasalamatan din niya ang pagkatig ng Tsina sa pandaigdigang usapin ng pagpigil at paggamot sa TB.
Nagpahayag naman si Ren Minghui, WHO Assistant Director-General for HIV & TB, ng pag-asang sa hinaharap, mangunguna sa buong mundo ang Tsina sa aspekto ng pagpawi sa TB bago ang taong 2030 at pagkontrol sa TB sa mababang lebel. Umaasa rin siyang patuloy na gagawa ang Tsina ng mas maraming pagsisikap at ambag para rito.
Salin: Vera
