Brussels, Belgium—Matapos ang kanilang pag-uusap, magkasamang nakipagtagpo Oktubre 17, 2018 sina Premiyer Li Keqiang ng Tsina at Punong Ministro Charles Michel ng Belgium sa mga mamamahayag. Isinalaysay nila ang bunga ng kanilang "tapat at malalim" na pag-uusap.
Binigyan-diin ni Li na patuloy na magsisikap ang dalawang panig para sa malusog at matatag na pag-unlad ng relasyon ng Tsina at Europa, pagpapasulong ng konektibidad ng Asya at Europa, at pagpapabilis ng proseso ng talastasan sa Bilateral Investment Treaty (BIT) ng Tsina at Europa. Aniya, nakahanda ang Tsina at Belgium na pahigpitin ang koordinasyon sa multilateral na framework na kinabibilangan ng United Nations, at pangalagaan ang multilateralismo at kaayusan batay sa mga tuntuning pandaigdig.
Ipinahayag naman ni Charles Michel na ang kooperasyon ng Belgium at Tsina ay mahalaga. Aniya, dapat galugarin ng dalawang bansa ang potensyal ng kanilang kooperasyon, magkasamang palalimin ang relasyon ng Europa at Tsina, lagdaan ang BIT sa lalong madaling panahon, at pasulungin ang win-win situation ng mga bahay-kalakal ng dalawang bansa. Aniya, may komong palagay ang dalawang panig sa pangangalaga ng multilateralismo at pamamahalang pandaigdig batay sa mga tuntuning pandaigdig.
salin:Lele