Idinaos ngayong hapon sa Singapore ang Ikalawang Pulong ng mga Lider ng Regional Comprehensive Economic Partnership (RCEP). Sa ngalan ng pamahalaang Tsino, lumahok sa pulong si Premyer Li Keqiang ng Tsina, kasama ng sampung bansa ng Association of Southeast Asian Nations (ASEAN), Timog Korea, Hapon, Australia, New Zealand at India.
Sa kanyang talumpati sa pulong, sinabi ni Premyer Li na nitong isang taong nakalipas sapul nang idaos ang unang katulad na pulong sa Maynila noong 2017, halos 80% ng talastasan hinggil sa RCEP ang natapos sa taong ito, kumpara sa 50% noong tinalikdang taon. Nanawagan si Li na patuloy na magsisikap ang iba't ibang panig para marating ang kasunduan ng RCEP sa 2019, at magdudulot ito ng benepisyo sa mga mamamayan ng rehiyon sa lalong madaling panahon.
Tinanggap ang panawagan ni Premyer Li ng ibang mga kalahok na lider. Nagkasundo silang pumasok na sa huling yugto ang talasatasan, at kailangan nilang ipakita ang pleksibilidad, pagiging inklusibo para marating ang komprehensibo, balanse, at de-kalidad na kasunduan sa 2019.
Nagkaisa rin ang mga kalahok na lider na patuloy na pasusulungin ang integrasyong pangkabuhayan, at ang kaayusang pandaigdig at malayang kalakalan, batay sa alitununan. Kaugnay nito, kinilala nila ang katuturan ng maagang paglalagda ng kasunduan sa RCEP sa pagsuporta ng multilateralismo at malayang kalakalan at pagpapasulong ng kabuhayang panrehiyon at globalisasyong pangkabuhayan.
Salin: Jade
