Nagtagpo ngayong gabi sa Singapore sina Premyer Li Keqiang ng Tsina at Punong Ministro Scott Morrison ng Australia sa sidelines ng serye ng pulong ng mga lider ng Silangang Asya. Ito ang ika-6 na taunang pagtatagpo ng mga punong ministro ng dalawang bansa.
Sinabi ni Premyer Li na mas marami ang komong interes ng Tsina't Australia kaysa sa pagkakaiba at ang pagtutulangan ay tumpak na pagpili. Ipinahayag ni Li ang mainit ng pagtanggap sa pagpasok sa pamilihang Tsino ng mga paninda mula sa Australia. Nakahanda aniya ang Tsina na magsikap, kasama ng Australia para galugarin ang potensyal ng pagtutulungan ng dalawang bansa at mapalawak ang kalakalan at pamumuhunan sa isa't isa.
Ipinahayag naman ni Morrison na itinuturing ng Australia ang pag-unlad ng Tsina bilang isa sa mga kahanga-hangang tagumpay ng Asya-Pasipiko. Kinikilala aniya ng Australia ang ginagampanang papel ng Tsina sa mga isyung panrehiyon at pandaigdig. Ipinahayag din ng punong ministro ng Australia ang pagpapahalaga ng kanyang bansa sa relasyon sa Tsina at ang kahandaang palalimin ang pagtutulungan ng magkabilang panig sa larangan ng kabuhayan, kalakalan, inobasyon, pagmimina, turismo, enerhiya at iba pa.
Hangad din ng dalawang punong ministro ang pagpapahigpit ng koordinasyon ng dalawang bansa sa pangangalaga sa multilateralismo, malayang kalakalan, pagbabago ng klima at iba pa.
Salin: Jade
