Isang artikulo ang inilabas nitong Miyerkules, Enero 31 ng Rodong Sinmun, opisyal na diyaryo ng Komite Sentral ng Workers' Party of Korea (WPK) ng Hilagang Korea (DPRK), bilang pagpuna sa paninindigang pagpapauna ng denuklearisasyon at saka pagpapahupa ng sangsyon.
Diin ng artikulo, ang nasabing paninindigan ng may kinalamang panig ay siyang dahilan kung bakit nasa deadlock pa rin ang talastasan sa pagitan ng Hilagang Korea at Amerika, nitong kalahating taon sapul nang idaos ang makasaysayang summit nina Kim Jong Un at Donald Trump sa Singapore noong Hunyo, 2018.
Hiniling ng artikulo sa may kinalamang bansa na tugunan ang kagandahang-loob at pagsisikap ng Hilagang Korea sa pamamagitan ng aktuwal na aksyon.
Dagdag pa ng artikulo, mananatiling buong tatag ang paninindigan ng Hilagang Korea na itatag ang bagong relasyon sa Amerika na nakatuon sa kahilingan ng bagong siglo, at lumikha ng pangmatagalan at matibay na mekanismong pangkapayapaan sa Korean Peninsula.
Salin: Jade
Pulido: Rhio