Nakipagtagpo kahapon, Miyerkules, ika-10 ng Abril 2019, sa Beijing, si Pangulong Xi Jinping ng Tsina, kay Min Aung Hlaing, Commander-in-Chief ng Defense Services ng Myanmar.
Ipinahayag ni Xi ang kahandaan ng Tsina, kasama ng Myanmar, na palakasin ang estratehikong pag-uugnayan ng dalawang bansa, palalimin ang kooperasyong may mutuwal na kapakinabangan, at walang tigil na payamanin ang komprehensibo, estratehiko, at kooperatibong partnership. Sinabi rin ni Xi, na kinakatigan ng Tsina ang prosesong pangkapayapaan ng Myanmar, at sinusubaybayan ang kalagayan sa hilagang bahagi ng bansang ito. Umaasa aniya siyang, magsisikap ang Myanmar, para palakasin ang pamamahala sa hanggahan, at pangalagaan, kasama ng Tsina, ang katiwasayan at katatagan sa hanggahan ng dalawang bansa.
Ipinahayag naman ni Min Aung Hlaing ang pasasalamat ng Myanmar sa Tsina para sa pagkatig nito sa pag-unlad ng estado at tropa ng Myanmar, at sa prosesong pangkapayapaan ng bansa. Ipinahayag din niya ang mainit na pagtanggap at aktibong paglahok ng Myanmar sa Belt and Road. Isasagawa ng Myanmar ang mga hakbangin para sa katatagan sa hanggahan sa Tsina, dagdag pa niya.
Salin: Liu Kai
