Binuksan kamakalawa, Biyernes, ika-12 ng Abril 2019, sa Boston, Amerika, ang Ika-22 Harvard College China Forum.
Sa seremonya ng pagbubukas, ipinahayag ni Michael Szonyi, Direktor ng Fairbank Center for Chinese Studies ng Harvard University, na ang relasyong Amerikano-Sino ay relasyong may mga aktuwal na nilalaman sa iba't ibang antas, at dapat dagdagan ng dalawang bansa ang pagpapalitan para maiwasan ang di-pagkakaunawaan. Sinabi naman ni Stephen Orlins, Pangulo ng National Committee on United States-China Relations ng Amerika, na optimistiko siya sa pangmalayuang pag-unlad ng relasyong Amerikano-Sino, at hindi dapat mawala ang kooperasyon ng dalawang bansa para sa pagharap sa mga isyung pandaigdig.
Ipinahayag naman ni Li Jiarong, Pangalawang Tagapangulo ng Harvard College China Forum at estudyanteng Tsino ng Harvard University, ang pag-asang, sa pamamagitan ng porum na ito, madaragdagan ang pagkaunawa ng ibang panig sa Tsina.
Kabilang sa mga pangunahing paksa ng 3-araw na porum ay pagtatatag ng tulay para sa diyalogo ng Tsina at Amerika, internasyonalisadong pangangasiwa ng mga bahay-kalakal na Tsino, pagiging internasyonal ng edukasyon ng Tsina, at iba pa.
Salin: Liu Kai