Ayon sa pinakahuling datos mula sa kapulisan ng Sri Lanka, umabot na sa 290 ang bilang ng mga namatay sa serye ng pagsabog sa Sri Lanka na naganap nitong nagdaang Linggo, Abril 21, at lumampas sa 500 ang bilang ng sugatan. Buong-tinding kinondena ang teroristikong atake nina Antonio Guterres, Pangkalahatang Kalihim ng United Nations (UN) at María Fernanda Espinosa Garcés, Presidente ng Ika-73 Pangkalahatang Asemblea ng UN. Ipinahayag din ng mga opisyal ng UN ang pagsuporta at pakikiisa sa mga mamamayan at pamahalaan ng Sri Lanka.
Ipinatalastas nitong Lunes ng pamahalaan ng Sri Lanka ang "state of emergency", at itinakda ang Martes, Abril 23 bilang Pambansang Araw ng Pagluluksa. Dalawampu't apat (24) na suspek ang nahuli ng kapulisan at kasalukuyang iniimbestigahan.
Salin: Jade
Pulido: Mac