Ipinatalastas nitong Miyerkules, Mayo 1, ng Tsina na 12 bagong hakbang ang ilalabas na ng bansa para ibayo pang magbukas sa labas ang pagbabangko at seguro.
Ito ang mga panibagong hakbang makaraang pairalin ng Tsina ang 15 hakbang ng pagbubukas ng pagbabangko at seguro ng bansa noong Abril, 2018. Tatlong tampok ang nakikita sa 12 bagong hakbang.
Una, kapuwa magtatamasa ang mga kompanyang Tsino at dayuhan ng mga benepisyong idudulot ng mga bagong hakbang. Halimbawa, kakanselahin ang upper shareholding limit ng isang single Chinese-funded bank at isang single foreign-funded bank sa isang bangkong komersyal ng Tsina. Tatalima ito sa bagong labas na Batas sa Puhunang Dayuhan at lilikha ng pantay na kapaligirang pangnegosyo para sa mga institusyong pinansyal na Tsino at dayuhan.
Ikalawa, kakanselahin ang ilang kahilingan sa pagpasok sa pamilihang Tsino ng mga institusyong pinansyal. Ayon sa pahayag ng Banking and Insurance Regulatory Commission (BIRC) ng Tsina, kabilang sa nasabing mga bagong hakbangin ay kanselasyon sa pag-apruba sa pagsasagawa ng negosyo sa renminbi ng mga bangkong dayuhan, pag-aalis ng kahilingang pang-ari-arian sa mga bangkong dayuhan sa kanilang pagbubukas ng legal person banks, kanselasyon sa kahilingan sa kabuuang halaga ng ari-arian ng mga dayuhang insurance brokerage company, at iba pa.
Ikatlo, palalawakin ang negosyo sa Tsina ng mga dayuhang institusyong pinansyal. Halimbawa, ang mga dayuhang bangko ay pahihintulutang magsagawa ng serbisyong pang-reminbi sa panahong magsimula sila ng negosyo sa Tsina.
Ang 12 paiiraling bagong hakbang ay bilang pagtupad sa pangako ni Pangulong Xi Jinping ng Tsina sa pagsasagawa ng limang patakaran at hakbang ng ibayo pang pagbubukas ng bansa sa katatapos na Ika-2 Belt and Road Forum for International Cooperation (BRF). Masasabing yugtu-yugtong ipinapatupad at ipapatupad ng Tsina ang pangako nito sa ibayo pang pagbubukas, ayon sa nakatakdang iskedyul.
Salin: Jade
