Sinabi kahapon, Lunes, ika-6 ng Mayo 2019, sa Beijing, ni Tagapagsalita Geng Shuang ng Ministring Panlabas ng Tsina, na hindi lalahok ang Tsina sa talastasan hinggil sa anumang trilateral na kasunduan sa disarmamentong nuklear.
Kamakailan, iniharap ng Amerika ang posibilidad na talakayin at marating, kasama ng Rusya at Tsina, ang trilateral na kasunduan sa pagkontrol sa armas.
Pinahindian ni Geng ang ganitong posibilidad. Sinabi niyang, ang puwersang nuklear ng Tsina ay nasa pinakamababang lebel batay sa pangangailangan ng tanggulang bansa, at maliit lamang ito kumpara sa laki ng hawak ng Amerika at Rusya. Hindi aniyang tatanggapin ng Tsina ang akusasyon mula sa anumang bansa sa isyu ng pagkontrol sa armas.
Binigyang-diin din ni Geng, na laging pinaninindigan ng Tsina ang komprehensibong pagbabawal at lubusang pagwasak ng mga sandatang nuklear. Dagdag niya, ang pinakamahalaga sa kasalukuyan ay pagtalima ng mga bansang may pinakamalaking arsenal na nuklear sa komong palagay ng komunidad ng daigdig, at ibayo pang pagbabawas ng mga sandatang nuklear, upang lumikha ng kondisyon para sa paglahok ng ibang mga bansa sa disarmamentong nuklear.
Salin: Liu Kai