Inilabas kahapon, Biyernes, ika-24 ng Mayo 2019, ng panig Tsino ang mga bunga ng Conference on Dialogue of Asian Civilizations (CDAC) na ginanap kamakailan sa Beijing.
Narating sa pulong ang CDAC Beijing Consensus kung saan itinataguyod ng mga kalahok ang pagpapalakas ng iba't ibang sibilisasyon ng paggalang at pagkatuto sa isa't isa at pagsasagawa ng mas maraming komprehensibo at malalim na pagpapalitan at pagtutulungan.
Sinang-ayunan ng Tsina at mga bansang Asyano na isagawa ang mga proyektong pangkooperasyon sa aspekto ng pangangalaga sa mga pamanang kultural, pagsasalin ng mga akdang klasiko, magkakasamang paggawa ng mga pelikula at TV program, at iba pa. Samantala, nilagdaan ang mga bilateral at multilateral na dokumento hinggil sa pag-iisponsor sa mga batang dalubhasa, pagpapalakas ng kooperasyon ng mga think tank, at iba pa.
Inilabas din sa pulong ang ilang ulat, na kinabibilangan ng ulat hinggil sa mga papel ng Asya sa global governance, survey hinggil sa kaalaman sa mga sibilisasyong Asyano, ulat hinggil sa kooperasyong panturismo sa Asya, at iba pa.
Idinaos mula ika-15 hanggang ika-22 ng buwang ito sa Beijing ang Conference on Dialogue of Asian Civilizations. Lumahok sa pulong at mga may kinalamang aktibidad ang mahigit 2000 personahe mula sa 47 bansang Asyano at mga bansa sa labas ng rehiyong ito.
Salin: Liu Kai