Nagkaroon Huwebes, ika-30 ng Mayo 2019, ng live television discussion ang China Global Television Network (CGTN) anchor na si Liu Xin at Fox Business Network host na si Trish Regan tungkol sa mga isyung pangkalakalan ng Tsina at Amerika. 16 na minuto lamang ang tagal ng talakayan, pero ilang punto ang karapat-dapat na pag-isipan.
Una, paggalang sa isa't isa
Sa talakayan, matimpi at mahinahon ang kapwa anchor, at ipinakita nila ang paggagalangan, katapatan, at kagandahang-loob. Sinagot ni Liu ang bawat tanong sa pamamagitan ng mataimtim na pag-isip. Hindi naman mapagmataas si Regan gaya ng kanyang gawi sa mga dating programa.
Hindi rin iniwasan ng dalawang anchor ang mga mahalagang paksa sa talakayan. Bagama't magkakaiba ang kani-kanilang posisyon sa mga isyung ito, ipinahayag pa rin nila ang kahandaang ipagpatuloy ang pag-uusap.
Ika-2, pantay na pagpapalitan
Sa kasalukuyang kalagayan ng alitang pangkalakalan ng Tsina at Amerika, ang pagsasagawa ng dalawang anchor ng pantay na pagpapalitan ay nagpapakitang ang diyalogo ay mas mabuti kaysa konprontasyon.
Ito rin ay inspirasyon sa pagsasanggunian sa isyung pangkalakalan ng Tsina at Amerika. Sa kabila ng mga tensyon, kung may katapatan ang dalawang panig sa talastasan, ganap na posible ang kanilang pantay na pagpapalitan at ito ay karapat-dapat na solusyon sa mga isyu.
Ika-3, pag-aalis ng mga maling pagkaunawa
Mula sa talakayan, napagtanto nating mayroong maraming maling pagkaunawa ang mga Amerikano tungkol sa Tsina, at ito ay dahil sa kanilang kakulangan sa tunay na kaalaman sa Tsina. Inanyayahan ni Liu si Regan na bumisita sa Tsina, at ito ay pinakamabuting paraan para malaman ang tunay na Tsina.
Ang maling pagkaunawa ay nagdudulot ng mga problema sa pagitan ng Tsina at Amerika. Ang solusyon ay paggagalangan at pantay na pagpapalitan, sa halip na konprontasyon. Ipinadala ng talakayan nina Liu at Regan ang isang mensaheng "sa pagitan ng Tsina at Amerika, ang diyalogo ay mas mabuti kaysa konprontasyon, at ang pagkakapantay-pantay ay mas mabuti kaysa pagmamataas." Ang mensaheng ito ay karapat-dapat na pag-isipan ng mga tao.
Salin: Liu Kai
