Sa white paper hinggil sa paninindigan ng Tsina sa pagsasangguniang pangkabuhaya't pangkalakalan ng Tsina at Amerika na inilabas Linggo, Hunyo 2, 2019 ng Tsina, isiniwalat nitong sapul nang simulan ang pagsasanggunian ng dalawang bansa hinggil sa kabuhaya't kalakalan noong Pebrero ng 2018, nagkaroon ng nagkakaisang palagay sa karamihan sa mga isyu, pero ilang beses na nagbago ang paninindigan ng Amerika, at paulit-ulit itong sumalungat sa komong palagay.
Anang white paper, noong Marso ng 2018, isang buwan lang pagkaraang simulan ang pagsasanggunian, isinumite ng pamahalaang Amerikano ang umano'y ulat ng Section 301 investigation sa Tsina, at ipinatalastas ang pagpapataw ng 25% karagdagang taripa sa mga inaangkat na paninda mula sa Tsina na nagkakahalaga ng 50 bilyong dolyares; noong Mayo ng 2019 naman, 10 araw makaraang magkasundo ang kapuwa panig sa hindi paglulunsad ng trade war, lumabag sa komong palagay ang pamahalaang Amerikano, at ipinasiyang patuloy na pasulungin ang plano sa pagpapataw ng karagdagang taripa; noong nagdaang buwan, di-responsableng binatikos ng Amerika ang pag-urong ng paninindigan ng Tsina, at pinataas sa 25% mula 10% ang taripa sa mga iniluluwas na panindang Tsino sa Amerika na nagkakahalaga ng 200 bilyong dolyares. Ipinatalastas din nitong sisimulan ang prosedyur ng pagpapataw ng karagdagang taripa sa natitirang iniluluwas na panindang Tsino sa Amerika na nagkakahalaga ng halos 300 bilyong dolyares.
Salin: Vera