Ipinahayag ni Boris Titov, Presidential Commissioner for Entrepreneurs' Rights at Tagapangulo ng Sino-Russian Committee for Friendship, Peace and Development, na ang relasyon ng Tsina't Rusya ay nasa pinakamagandang panahon sa kasaysayan, at walang hanggan ang pag-unlad nito sa hinaharap.
Winika ito ni Titov sa bisperas ng 2019 St. Petersburg International Economic Forum na gaganapin sa St. Petersburg, Rusya, mula Hunyo 6 hanggang Hunyo 8. Nakatakdang lumahok sa porum si Pangulong Xi Jinping ng Tsina.
Noong 2018, lumampas sa 107 bilyong dolyares ang kalakalan ng Tsina't Rusya, na nakalikha ng bagong rekord. Kaugnay nito, sinabi ni Titov na naitakda ng dalawang bansa ang target na pagdoble ng bilateral na kalakalan, at naniniwala siyang maisasakatuparan ang target na ito sa susunod na ilang taon. Dagdag pa niya, sa gagawing pagdalaw ni Pangulong Xi, ang serye ng mga bagong kasunduan ay inaasahang pipirmahan ng dalawang bansa.
Kinilala rin ni Titov ang pagtutulungan ng Tsina't Rusya sa proseso ng magkasamang pagpapasulong ng Belt and Road Initiative. Salaysay niya, kabilang sa mga pangunahing kooperatibong proyekto ng dalawang bansa ang konstruksyon ng imprastruktura, pagtutulungang agrikultural, langis at natural gas, heavy-lift helicopter, wide-body aircraft, at iba pa.
Salin: Jade
Pulido: Rhio