Sa katatapos na Ika-5 Summit ng Conference on Interaction and Confidence Building Measures in Asia (CICA) sa Dushanbe, Tajikistan, nagtalumpati si Pangulong Xi Jinping ng Tsina hinggil sa paninindigan ng bansa sa pagpapasulong ng pangmatagalang kapayapaan at komong kasaganaan ng Asya. Iniharap din ng pangulong Tsino ang mga mungkahi para mapalalim ang pag-uunawaan, mapalakas ang pagtitiwalaan, mapahigpit ang pagtutulungan, at maisakatuparan ang komong kaunlaran ng mga bansang Asyano.
Sinabi ni Do Tien Sam, dating Direktor ng Instituto ng Pananaliksik na Tsino ng Vietnamese Academy of Social Sciences, na napakinggan sa talumpati ni Xi ang proposal hinggil sa pagtatatag ng komunidad ng Asya na may pinagbabahaginang kinabukasan. Ang nasabing proposal ay hindi lamang angkop sa Asya, makakabuti rin ito sa sariling interes ng iba't ibang bansa, dagdag pa ni Do. Saad din niya, binigyang-diin ni Xi na ang Tsina ay patuloy na magsisilbing tagapagtatag ng kapayapaang pandaigdig, tagapag-ambag ng kaunlarang pandaigdig, at tagapangalaga ng kaayusang pandaigdig. Aniya, muli nitong ipinakita ang pagiging responsable ng Tsina bilang bansang Asyano at miyembro ng komunidad ng daigdig, at hangaring mag-ambag pa sa kapayapaan at kasaganaan ng daigdig.
Ipinahayag naman ni Jaewoo Choo, Propesor ng Kyung Hee University na ang pananangan ng Tsina sa landas ng mapayapang pag-unlad ay nagdudulot ng ambag sa kasaganaan ng rehiyon at daigdig. Umaasa aniya siyang patuloy na gaganap ang Tsina ng papel sa pagpapasulong ng katatagan, kaunlaran at pagtutulungan ng Asya.
Salin: Jade
Pulido: Rhio
