Martes, Hunyo 18, 2019, sa kanyang pakikipagtagpo sa Beijing kay Walid Muallem, dumadalaw na Pangalawang Punong Ministro at Ministrong Panlabas ng Syria, ipinahayag ni Wang Yi, Kasangguni ng Estado at Ministrong Panlabas ng Tsina, na nitong ilang taong nakalipas, bagama't nagiging magulo ang situwasyon ng Syria, hindi nagbabago ang pangkalahatang direksyon ng pagkakaibigang Sino-Syrian.
Ipinagdiinan ni Wang na patuloy at buong tatag na kinakatigan ng panig Tsino ang ginagawang pagsisikap ng Syria sa pangangalaga sa soberanya, pagsasarili, at kabuuan ng teritoryo ng bansa. Buong tatag ding kinakatigan ng Tsina ang Syria sa pagbibigay-dagok sa terorismo, pagpapanumbalik ng katatagan at kaligtasang pang-estado, at pagsasagawa ng rekonstruksyong pangkabuhayan.
Ipinahayag naman ni Muallem ang kahandaan ng Syria na aktibong lumahok sa "Belt and Road" Initiative. Inaasahan aniya ng Syria ang pagpapalawak ng pamumuhunan ng mga bahay-kalakal na Tsino sa kanyang bansa. Nakahanda ang Syria na tutulan kasama ng iba't-ibang bansa, ang isinasagawang unilateralismo at economic terrorism ng Amerika sa daigdig.
Salin: Li Feng
