New Delhi, India—Daan-daang mamamayan ng India ang nagrali nitong Martes, Hunyo 25, local time, bilang protesta sa pagdalaw ni Mike Pompeo, Kalihim ng Estado ng Estados Unidos sa kanilang bansa. Binatikos nila ang patakaran ng Amerika sa Gitnang Silangan at ang proteksyonismo at unilateralismo ng Amerika.
Ang protesta ay inorganisa ng All India Peace and Solidarity Organisation (AIPSO). Iniwagayway ng mga demonstrador ang mga streamer na may pananalitang tulad ng "Huwag Ilunsad ang Digmaan laban sa Iran" at "Tutol sa Proteksyonismo," at isinigaw ang mga islogan na gaya ng "Huwag Sumuko sa Paniniil ng Amerika."
Nanawagan ang mga demonstrador sa pamahalaan ng India na huwag itigil ang pag-aangkat ng langis mula sa Iran dahil sa presyur ng Amerika. Ipinahayag din nila ang pagtutol sa pakikialam ng Amerika sa mga suliraning panloob ng Cuba at Venezuela.
Dumating sa India si Pompeo Martes ng gabi, para sa kanyang tatlong araw na biyahe sa bansa. Si Pompeo ang unang mataas na opisyal na Amerikano na dumalaw sa India sapul nang manumpa ang bagong pamahalaan ni Punong Ministro Narendra Modi.
Salin: Jade
Pulido: Rhio