Ayon sa pinakahuling datos na inilabas nitong Linggo, Hunyo 30, ng Ministri ng Industriya at Teknolohiyang Pang-impormasyon ng Tsina, noong unang limang buwan ng taong ito, umabot sa 2.63 trilyong yuan RMB ang kita ng sektor ng software ng bansa, at mas mataas ito ng 14.7% kumpara sa gayon ding panahon ng taong 2018.
Inilahad ni Xie Shaofeng, Puno ng Dibisyon ng Impormatisasyon at Serbisyo ng Software ng nasabing ministri na bunga ng lumalaking pangangailangan mula sa sektor na industriyal at iba pang mga larangan ng lipunan, naisakatuparan ng sektor ng software ang mabilis na pag-unlad.
Ani Xie, aktibo rin ang pakikipagtulungang pandaigdig ng sektor ng software ng Tsina, lalo na sa larangan ng intelligent manufacturing at Industrial Internet. Dagdag pa ni Xie, salamat sa mga preperensyal na patakaran ng Tsina, mabilis din ang pag-unlad ng mga dayuhang kompanya ng software sa Tsina. Ayon sa datos ng Tsina, noong 2018, umabot sa 194.6 na bilyong dolyares ang kita ng nasabing mga kompanya. Ipinangako rin ng opisyal Tsino na sa hinaharap, ibayo pang bubuksan ang pamilihan ng industriya ng software ng bansa.
Salin: Jade
Pulido: Rhio