Ipinahayag kahapon, Lunes, Julyo 1, 2019, sa Beijing, ni Tagapagsalita Geng Shuang ng Ministring Panlabas ng Tsina, ang pagtanggap ng kanyang bansa sa pagtatagpo ng mga lider ng Hilagang Korea, Amerika, at Timog Korea sa Demilitarized Zone, lugar sa pagitan ng Hilaga at Timog Korea. Aniya, konstruktibo ang pagtatagpo at positibo ang mga bunga nito.
Sinabi rin ni Geng, na laging pinaninindigan ng Tsina ang pagsasakatuparan ng denuklearisasyon sa Korean Peninsula, pangangalaga sa kapayapaan at katatagan ng peninsula, at paglutas sa mga isyu sa pamamagitan ng diyalogo.
Dagdag niya, ang pagdalaw kamakailan ni Pangulong Xi Jinping ng Tsina sa Hilagang Korea ay nagbigay ng bagong lakas sa pulitikal na paglutas sa isyu ng Korean Peninsula. Ang naturang pagtatagpo naman ng tatlong bansa ay angkop sa komong interes ng iba't ibang panig at inaasahan ng komunidad ng daigdig.
Salin: Liu Kai