Ayon sa datos na isinapubliko kamakailan ng Pambansang Kawanihan ng Estadistika ng Tsina, nitong 70 taong nakalipas sapul nang maitatag ang bagong Tsina, naisakatuparan ang napakalaking pag-unlad ng pundamental na industriya at imprastruktura ng bansa, bagay na nagkakaloob ng matatag na garantiya sa sustenableng pag-unlad ng kabuhayan at lipunan. Partikular sa larangan ng komunikasyon at transportasyon, noong katapusan ng nagdaang taon, magkahiwalay na lumaki ng 5 at 59 na beses ang buong haba ng naisaoperasyong daam-bakal at lansangan ng Tsina kumpara sa katapusan ng taong 1949. Samantala, kumpara sa katapusan ng 1950, lumaki ng 734 beses ang buong haba ng regular flight routes ng bansa.
Sa kasalukuyan, ibayo pang lumiit ang agwat ng industriya ng komunikasyon at transportasyon ng Tsina kumpara sa unang hanay na lebel sa daigdig. May mga bahagi rin sa larangang ito na umabot sa sulong na lebel sa daigdig. Halimbawa, umabot sa 29 libong kilometro ang haba ng naisaoperasyong high-speed railway ng Tsina na nasa unang puwesto sa daigdig; pumuwesto rin sa una sa daigdig ang buong haba ng expressway ng Tsina na lampas sa 140 libong kilometro.
Salin: Li Feng