Ayon sa impormasyong inilabas nitong Miyerkules, Hulyo 3, 2019 ng website ng Tanggapan ng Ministring Panlabas ng Tsina sa Hong Kong, nagharap na ang tanggapan nito sa Hong Kong ng solemnang representasyon sa panig Britaniko tungkol sa maling komento ng Foreign Secretary nitong si Jeremy Hunt. Ipinahayag din nito ang matinding kawalang-kasiyahan at pagtutol sa panig Britaniko hinggil dito.
Anang tanggapan, ang karahasan ay nananatiling karahasan, at ang krimen naman ay nananatiling krimen. Ito ay hinding hindi pinahihintulutan ng anumang bansa at lipunan. Dapat itong buong tatag na tutulan at buong higpit na kondenahin ng anumang taong taglay ang konsiyensiya at iginigiit ang pagpapatupad sa batas, anito pa.
Muling ipinaalam ng nasabing tanggapan sa panig Britaniko na ang Hong Kong ay nabibilang sa Tsina, at ito't isang espesyal na rehiyong administratibo ng Tsina. Kasunod ng pagbalik ng Hong Kong sa inangbayan at pagtatapos ng mga gawain sa transisyonal na panahon, natupad na ang lahat ng karapatan at obligasyong may kinalaman sa Britanya na itinatadhana sa "Magkasanib na Pahayag ng Tsina at Britanya." Walang anumang batayan ang lantarang pakikialam ng panig Britaniko sa mga suliranin ng Hong Kong sa katuwiran ng nasabing magkasanib na pahayag, anito pa.
Hiniling din nito sa panig Britaniko na tumpak na pakitunguhan ang katotohanan nitong 22 taon, na sapul nang bumalik ang Hong Kong sa inangbayan, iwasto ang kamalian nito, tupdin ang pandaigdigang batas at pundamental na norma ng relasyong pandaigdig, igalang ang soberanya ng Tsina, at agarang itigil ang panghihimasok sa suliranin ng Hong Kong at suliraning panloob ng Tsina.
Salin: Li Feng
