Beijing — Sa kanyang pakikipagtagpo nitong Biyernes, Hulyo 5, 2019 kay Punong Ministro Sheikh Hasina Wazed ng Bangladesh, ipinagdiinan ni Pangulong Xi Jinping ng Tsina, na dapat pag-ibayuhin ng dalawang bansa ang tradisyonal na pagkakaibigan upang buong sikap na maisakatuparan ang komong pag-unlad ng dalawang bansa.
Sinabi ni Xi na kasalukuyan, kapwa nasa masusing yugto ang pag-unlad ng Tsina at Bangladesh. Aniya, ang pagpapatibay at pagpapaunlad ng estratehikong partnership ay hindi lamang angkop sa komong kapakanan ng dalawang bansa, kundi nakakabuti pa sa kasaganaan at katatagan ng Asya at bukas na kooperasyon sa buong daigdig.
Hinahangaan din ni Xi ang ibinibigay na pagkatig ng Bangladesh sa mga isyung may kinalaman sa nukleong kapakanan ng Tsina. Tulad ng dati, patuloy aniyang kakatigan ng Tsina ang ginagawang pagsisikap ng Bangladesh sa pangangalaga sa pagsasarili at soberanya nito. Bukod dito, dapat palakasin ng dalawang panig ang kooperasyon ng Tsina at Bangladesh sa mga larangang gaya ng kalakalan, pamumuhunan, kakayahan ng produksyon, enerhiya at koryente, komunikasyon at transportasyon, tele-komunikasyon, konstruksyon ng imprastruktura, at agrikultura, ani Xi.
Ipinaabot naman ni Hasina ang maringal na pagbati sa ika-98 Anibersaryo ng pagkakatatag ng Partido Komunista ng Tsina (CPC), at ika-70 Anibersaryo ng pagkakatatag ng Republika ng Bayan ng Tsina. Pinahahalagahan aniya ng Bangladesh ang mapagkaibigang relasyon sa Tsina, at iginigiit nito ang patakarang Isang Tsina. Umaasa aniya siyang ibayo pang mapapalakas ang kooperasyon ng dalawang bansa sa mga larangang tulad ng kalakalan, pamumuhunan, konstruksyon ng imprastruktura, digital economy, pagharap sa pagbabago ng klima, at paglaban sa terorismo.
Salin: Li Feng
