Ayon sa ulat ng tanggapang pampanguluhan ng Iran, sa kanyang pakikipag-usap sa telepono kahapon, Sabado, ika-6 ng Hulyo 2019, kay Pangulong Emmanuel Macron ng Pransya, sinabi ni Pangulong Hassan Rouhani ng Iran, na nitong 14 na buwang nakalipas, sa pamamagitan ng "estratehikong tiyaga," nagsisikap ang Iran para sagipin ang Joint Comprehensive Plan of Action (JCPOA) tungkol sa isyung nuklear. Umaasa aniya siyang, pag-iibayuhin din ng Unyong Europeo (EU) ang pagsisikap para isalba ang kasunduang ito.
Ipinahayag pa ni Rouhani, na ang mga sangsyon ng Amerika laban sa Iran ay naituturing na teroristikong gawain at kabilang sa komprehensibong digmaang pangkabuhayan. Kung ipagpapatuloy ang mga sangsyon, ito aniya ay magdudulot ng banta sa Gitnang Silangan at buong daigdig.
Samantala, ayon sa pahayag na inilabas ng tanggapang pampanguluhan ng Pransya pagkaraan ng nabanggit na pag-uusap, muling ipinahayag ng EU ang buong tinding pagtutol sa pag-urong ng Amerika sa JCPOA. Nagkasundo rin sina Macron at Rouhani, na bago ang ika-15 ng buwang ito, tatalakayin ang hinggil sa mga kondisyon sa pagdaraos ng talastasan para panumbalikin ang naturang kasunduan, anang pahayag.
Salin: Liu Kai