Ipinahayag kahapon, Hulyo 6, sa Doha, Qatar, ni Zalmay Khalilzad, Espesyal na Kinatawan ng Pamahalaan ng Amerika sa Rekonsiliyasyon ng Afghanistan, na nagtamo ng tunay na progreso ang ikapitong round ng negosasyon sa pagitan ng Amerika at Afghan Taliban.
Sinabi ni Khalilzad, na sinimulan noong Hunyo 29 ang naturang round ng negosasyon, at ang dalawang panig ay gumawa ng tunay na pag-unlad sa mga larangang gaya ng kontra-terorismo, pag-urong ng mga sundalong Amerikano, panloob na diyalogo ng Afghanistan, at permanente at komprehensibong tigil-putukan. Ito ang "pinakamabuting negosasyon" simula nang isagawa ng dalawang panig ang direktang negosasyon, ani Khalilzad.
Samantala, ang panloob na diyalogo ng Afghanistan na itinataguyod ng Qatar at Alemanya ay nakatakdang ganapin ngayong araw sa Doha. Sinabi ni Khalilzad na upang "suportahan ang diyalogong ito," ang kasalukuyang round ng negosasyon sa pagitan ng Amerika at Taliban ay suspendido sa loob ng dalawang araw mula Hulyo 7 hanggang Hulyo 8. Naniniwala aniya siyang ang diyalogong ito ay isang "disididong pangyayari" sa proseso ng kapayapaan ng Afghanistan.
Salin: George Guo