Nagtagpo nitong Martes, Hulyo 9, local time, sa Warsaw, Poland sina Wang Yi, dumadalaw na Kasangguni ng Estado at Ministrong Panlabas ng Tsina, at Pangulong Andrzej Duda ng Poland.
Sinabi ni Pangulong Duda na sa okasyon ng ika-70 anibersaryo ng pagkakatatag ng relasyong diplomatiko ng Tsina at Poland ngayong taon, pinahahalagahan ng kanyang bansa ang tradisyonal na pagkakaibigan ng dalawang bansa. Ipinahayag din niya ang mainit na pagtanggap sa pamumuhunan sa Poland ng mas maraming kompanyang Tsino.
Ipinahayag naman ni Wang ang pagpapahalaga ng Tsina sa komprehensibong estratehikong partnership sa Poland. Umaasa aniya ang panig Tsino na sasamantalahin ang mga oportunidad para walang-humpay na mapasulong ang mga pragmatikong pagtutulungan ng dalawang bansa.
Kapuwa nila ipinahayag ang kahandaan ng dalawang bansa na magkasamang pasulungin ang pagtutulungan sa ilalim ng Belt and Road Initiative (BRI), pagtutulungan ng Tsina't Sentral at Silangang Europa, at pagtutulungang Sino-Europeo. Nakahanda rin anila ang dalawang bansa na palakasin ang koordinasyon sa mga suliraning panrehiyon at pandaigdig, at magkasamang pangalagaan ang multilateralismo, para mapasulong ang kapayapaan at kasaganaan ng rehiyon at daigdig.
Salin: Jade
Pulido: Rhio