Ipinahayag nitong Huwebes, Hulyo 18 ni Lian Weiliang, Pangalawang Direktor ng National Development and Reform Commission (NDRC) ng Tsina na ibayo pang pabibilisin ng bansa ang pagpapabuti ng pangangasiwa at pagsusuperbisa sa social credit ng mga entidad para makalikha ng mainam na kapaligirang pangnegosyo.
Winika ito ni Lian sa preskon sa Beijing, kaugnay ng may kinalamang dokumento na inilabas kamakailan ng Konseho ng Estado, gabinete ng Tsina.
Salaysay ni Lian, nakatuon ang bagong dokumento sa mga sektor na may mahigpit na kaugnayan sa kaligtasan ng mga mamamayan, na gaya ng pagkain at medisina, kapaligirang ekolohikal, kalidad ng mga proyekto, kaligtasan ng mga lugar na pinagtatrabahuhan, pag-aalaga sa matatanda, pag-aaruga sa mga bata, transportasyon sa mga lunsod, at iba pa.
Ayon kay Lian, hiniling din ng dokumento na pabutihin ang bagong sistema ng pangangasiwa at pagsusuperbisa sa social credit, para maprotektahan ang mga kompanyang tumatalima sa batas at may magandang rekord ng kredito, at parusahan, at higit pa, itiwalag sa pamilihan ang mga labag sa batas at alituntunin. Para sa mga entidad na may magandang rekord, babawasan ang pagsusuri at para naman sa kompanyang masama ang rekord, patataasin ang pagsusuri at pagsusuperbisa, dagdag pa ni Lian.
Salin: Jade
Pulido: Rhio